Esei ke men un Kòrsou ku hende ku konfiansa propio. Hende ku ta tuma inisiativo pa yuda otro, pa yuda nan mes, ku ta ekspresá nan ideanan libremente. Hende ku ta hiba emansipashon di nan komunidat mas aleu.

Un Kòrsou ku hende ku ta orguyoso di nan lugá i ku ta yuda mantené naturalesa rondó di nan. Asina nan por ofresé nos yunan i nietunan un Kòrsou dushi i habitabel.

Kòrsou Duradero tambe ke men ku desaroyo ekonómiko mester bai sam sam ku kuido pa nos naturalesa. Nos a pèrdè hopi mondi, seru i paisahe kaba na Kòrsou, i tambe naturalesa menos visibel den laman. Ku mas kreatividat i inteligensha nos mester por logra skohe un tipo di desaroyo kaminda ta tene kuenta ku naturalesa i tòg krea aktividat ekonómiko. Tipo di aktividat ku ta eksigí menos espasio, ku no ta afektá airu, tera, laman i kosta i ku no ta krea molèster, ta nèt e tiponan di aktividat ekonómiko ku ta basá riba hende bon formá i eduká. Pa un desaroyo duradero na Kòrsou pues edukashon pa un i tur ta prioridat.

Otro eksigensha pa Kòrsou Duradero ta demokrasia real. Sin partisipashon di tur hende den desaroyo di nos isla bo por bien lubidá tur plan di desaroyo. Nos komunidat tambe meresé mas transparensha di gobièrnu i e siguransa ku mandatárionan i polítikonan ta traha na interes general i no pa un grupito ku plaka i poder.

Kuido sosial ta un otro pilar di un komunidat duradero. Negligensha di esaki ta resultá den mas miseria pa pueblo i mas frustrashon. Esei no ta un base pa spera un aporte boluntario di pueblo pa desaroyo sosial, kultural i ekonómiko di nos isla. Kuido sosial no mester ta parti di un "flankerend beleid", pero un di e pilarnan prinsipal di un maneho sosial integral.

Amigu di Tera ta di opinion ku tur loke ta deskribí aki riba ta kondishon pa un bon maneho i bon komportashon pa ku naturalesa. No por mira kuido pa naturalesa lòs for di bida di hende, no por miré lòs di e aspektonan sosial, edukativo, demokrátiko, kultural i ekonómiko di komunidat.