Amigu di Tera     komunikado di prensa 28 di juni 2005

 

Shell ta keda responsabel

 

 

Binti aña pasá Shell a terminá su aktividatnan petrolero na Kòrsou. Esaki tabata dos aña despues di un rapòrt devastador tokante e situashon di refineria Isla i su impakto ambiental. Manera bon mucha nos gobièrnu a akseptá e eksigensha di Shell ku nunka nan lo no eksihí daño di perhuisio pa e daño enorme kousá na medio ambiente di nos isla chikí i vulnerabel.

 

Gobièrnu a haña e refineria pa solamente ún florin, un ‘regalo’ di Shell. Bon mirá el’a tuma enkargo di tur e daño ambiental i e peso di un proseso di rafinashon defisiente, deskribí ampliamente den e rapòrt, pagando ún florin.

Diferente polítiko a yega di yama Shell Kòrsou “un estado dentro di un estado”. Ku otro palabra, nos mandatarionan no tabata sa kiko tabata sosodé den e refineria i no mester a ni purba pa sa tampoko.

 

Un ilustrashon di podér di Shell ta ku na 1952 gobièrnu a dekretá ku e multinashonal petrolero akí lo keda eksonerá di ordenansa di molèster, dos aña promé ku Antias haña su status autónomo den reino. E situashon aki tabata meskos ainda na salida di Shell na 1985. Nos outonomia no tabatin ningun influensha riba e status di e poder ekonómiko mayó, i e dunadó di trabou prinsipal di Kòrsòu. Ku gran plaser Shell por a hinka e 350 miyon dòler ku el a  reservá pa na final desmantelá e refineria  den su mes saku.

 

Mas i mas siudadano ku antes tabatin un otro opinion ta realisá awe ku e desishon pa laga Shell bai di e manera ei tabata un fayo enorme. Mihó a sera e refineria, desmantelé, i limpia e tereno kaminda e tabata pará. Esaki lo a habri kaminda pa otro aktividat ekonómiko limpi den area di haf, i alabes lo a krea un klima ekselente pa desaroyo di turismo na nos isla.

 

 

Ta difisil haña klaridat di e papel ku gobièrnu Ulandes a hunga den e susesonan akí na aña 1985. Ruud Lubbers ku e tempu ei tabata premier di Ulanda a bai Venezuela i a konsehá nos gobièrnu. E resultado amargo tabata ku te awe nos a keda ku e herensia ambiental di Shell ku nos no por logra dominá. Ta altamente straño ku  netamente konseho di gobièrnu Ulandes a hinka nos den e situashon aki, sabiendo ku un isla chikí no por manehá un refineria gigantesko i opsoleto, te pa e por kombatí e polushon ku e ta produsí.  Polushon ku ni Shell mes no por a dominá. Un interpretashon straño di e “ Met De Wil Om Elkander Bij Te Staan”

 

 

 

 

E aktuashon di nos politikonan a keda swak, loke a resultá den masha tiki benefisio pa Korsou despues di deliberashonnan ku PdVSA ku ta hür e refineria na un preis masha faborabel, mientras ku e no tin ku paga belasting riba su ganashinan. E no ta tene su mes na e reglanan minimal pa ku medio ambiente, marginalmente e ta invertí den  medidanan ambiental i pa kolmo e ta obligá gobièrnu pa paga un parti di e medidanan aki, i ora hende ta sufri di molèster di polushon di refineria e ta kulpa kambio di wer.

 

Amigu di Tera semper a vosiferá tantu na Shell komo na públiko i na gobièrnu Ulandes, ku e gigante petrolero Shell ta keda responsabel pa tur daño na salú i na medio ambiente ku el a kousa. No por t’asina ku un di e multinashonalnan mas pudiente na mundu ta shusha un di e islanan di mas chikí di e mes mundu, kousa daño di salú, i despues ta kue su bulchi laga kai i keda liberá di su responsabilidat pa loke el a venená.

El a laga atras su refineria koroto manera un tijdbòm, pasobra pa e komunidat chikí aki e problema ta inkontrolabel, diariamente e ta venená hende i akumulá shushedat den medio ambiente. Tantu bal opshon di drecha òf di sera refineria e ta hinka e isla chikí aki den gastunan gigantesko, ku nos no por karga.

 

Pa Amigu di Tera Shell ta i ta keda responsabel pa su polushon i tambe pa e gastunan di desmantelashon i limpiesa ora yega asina leu.

 

Si den pasado Gobiernu di Ulanda a enkargá Lubbers ku destino di nos i e refineria, awe nan lo tin ku karga konsekuesia i pensa aktivamente pa yega na un solushon akseptabel pa habitantenan di Kòrsòu. Peso di  e polítiko i negoshadonan lokal den e proseso akí mester ta di un kaliber hopi mas haltu ku loke nos konosé te awor. Nos pueblo mester por konta ku ta trata e kestion akí ku ta regardá su salú, su goso di bida i kurason di ekonomia di su isla  na un manera berdaramente profesional.

 

 

 

Presidente di Amigu di Tera

Yvette Raveneau

Tel. 7373965