Amigu di Tera & Defensa Ambiental

Komunikado di prensa 4 yüni 2009

 

Dia Internashonal di Medio Ambiente 2009: 20 aña despues di demostrashon masal na Wishi/Marchena.

 

 

Ku e veredikto resien en kuanto polushon di airu kousá pa refineria Isla S.A., e drama di refineria ta bolbe den e esena kaminda mester ta, esta: refineria tin ku kumpli ku su pèrmit di molèster. Pronto nos lo tende tambe ku gobiernu mester soru pa Isla mantené su mes na stipilashonnan den su pèrmit di molèster. Esaki ta algu ku ta dimes pa tur hende ku eksepshon di nos élite polítiko. Ta refineria mes a formulá e pèrmit eksistente i gobiernu a aksepté. Esaki tábata e resultado despues di un proseso largu di parti di pueblo kontra e polushon inakseptabel di e fábrika aki.

 

5 di yüni 2009, Dia Internashonal di Medio Ambiente, nos ta selebrá ku eksáktamente 20 aña pasá habitantenan di Wishi i Marchena i diferente otro bario pabou di Isla, i tambe di rònt Kòrsou a tene un manifestashon masal kontra polushon di airu.

 

E inisiativa a bini di organisashonnan di bario di Wishi i Marchena. Nan a aserká nos organisashonan pa yuda mobilisá pueblo pa un manifestashon.

 

Ta e ora ei pueblo a bin komprondé ku PDVSA, meskos ku su predesesor Shell, no tabatin pèrmit di molester, hasta  Shell den su ten a keda eksonerá di tal permit.  Na 1953, un aña promé ku Antiya a haña un status outónomo den Reino Ulandes, e gigante petrolero Britaniko-Ulandes a eksihí esaki.

Na 1984 Dienst Centraal Milieubeheer Rijnmond (DCMR) a traha un rapòrt ku rekomendashon pa baha molèster di polushon di Shell na Kòrsou. Dos aña despues Shell a sera,i pa un florin Teritorio Insular a tuma e fábrika ku su polushon akumulá i su futuro polushon.

 

Kòrsou a hür e refineria ku PDVSA, ku no solamente a keda librá di tur regla ambiental, pero tambe a haña tur klase di fasilidat di belasting. Gobiernu ku ta doño di e fábrika ta hür esaki ku PDVSA pa un suma sumamente abou kompará ku su entrada. Si hasi invershon pa mehoransa di medio ambiente, gobiernu tin ku karga mitar di e gastu. Asina polítika di Willemstad a sera un dil sumamente desventahoso i a keda den gara di un polushon di medio ambiente gigantesko.

 

Komo konsekuensha di e demostrashonnan masal na 1989, 1990 i 1991, kada biaha riba Dia Internashonal di Medio Ambiente, gobièrnu a disidí di saka e konsepto di lei di molèster ku tabatin 12 aña drumí den lachi.

Porfin na 1994 nos  a haña un lei di molèster nobo ku a forma base di e pèrmit di molèster ku refineria a haña na 1997.

E pèrmit aki ku riba diferente punto ta vago i ku eksihenshanan hopi swak i leve. Pései nos organisashonnan a hasi uzo di nan derechi di manda nan opheshon i apelashon pa gobièrnu. Te awe, diesdos aña despues, ainda no a bini niun kontesta di parti di gobièrnu.

 

Ta masha kla ku no tin gobernashon. Awor ta hues tin ku sinta riba stul di gobernantenan pa kòrda nan ku den e 12 añanan ku a pasa, ta nan mester a obligá PDVSA kumpli ku eksihensianan di pèrmit di molèster, i ku esaki ta konta den futuro tambe.

 

Esaki ta un fayo garafal di nos élite polítiko ku ta pretendé di por realisá berdadero outonomia pa nos pais. E siudadanonan i e organisashonnan sivil ku a bai korte, a pone dede riba e herida di nos sistema polítiko. Laga nos spera ku e veredikto di 1 di yüni ta sakudí polítika i ku por fin nan ta kuminsá goberná na interes di pueblo, inkluso interes di trahadonan na Isla. Un bon kalidat di medio ambiente ta na nan bienestar i na nan salú tambe, i ta kuadra bon mirá ku interes ekonómiko di nos pais.

 

Amigu di Tera                             Defensa Ambiental

Yvette Raveneau                         Lloyd Narain                             tel. 737 3965