Amigu di Tera – komunikado di prensa  17 di mei 2011

 

Shell, mester pidi deskulpa i paga pa daño kousá na medio ambiente mundialmente.

 

Den Haag , 17  di mei 2011. Awe, den e reunion annual di akshonista di Shell, Friends of the Earth a parti un rapòrt pa mustra i rekòrdá direktiva i akshonistanan ku nan kompania ta kulpabel na daño enorme na medio ambiente, na sernan humano i komunidatnan, tantu awor komo den pasado, riba tur sinku kontinente di nos planeta.                                                                                                                                            Kòrsou ta figurá entre e 12 kasonan spesífiko di abusu ambiental i sosial di Shell, menshoná den e rapòrt.

No ta promé biaha ku Amigu di Tera di Kòrsou ta hasi uzo di e reunion annual pa hala atenshon di direktiva i akshonistanan di Shell riba nan responsabilidat pa ku e polushon serio di tera i laman ku Shell a bai laga despues ku ela bai for di Kòrsou  na 1985. Den añanan ‘90 Amigu di Tera a laga lesa un karta den e reunion annual di e empresa internashonal aki, kaminda ta akusá Shell di a pone riba lomba di un islita ku un poblashon chikí, e enkargo pa resolvé  un alto grado di polushon kousá pa Shell, sabiendo ku nos no tin forsa pa hasié. Esaki ta un abusu kontra aktual i futuro habitantenan di Korsou, i Shell mester asumí su responsabilidat pa e daño innesesario di su kompania na medio ambiente.

E rapòrt ta enfatisá  enbolbimentu di Shell den eskándalonan ambiental rònt mundu, entre otro kasonan di “high volume gasfracking” ku ta forma kantidat kuatioso di gasnan ku ta kousa keintamentu global. Shell ta hasi uzo di maneranan di produkshon ku ta menasá areanan vulnerabel i bestia i mata ku ta serka di ekstinshon. Shell no ta ruime op su deramennan di zeta i ta bai laga areanan devastá ku polushon di tera i awa.Tambe e rapòrt ta enfatisá ku Shell ta hasi uzo di korupshon i di preshon polítiko pisá, pa salbaguardiá su interesnan komersial, por ehèmpel na  Nigeria.

Na Brasil, Shell a drenta un joint venture ku un produktor di biofuel, Cosan S.A., un empresa ku ta violá derechinan laboral gravemente i kaminda por papia hasta di sklabitut.

Representantenan di Nigeria i Canada a dirigí palabra na akshonistanan i miembronan di direktiva di Shell pa mustra riba e impakto negativo ku e empresa tin riba nan komunidat. “Shell su pipanan ta lèk zeta i a kontagiá  awa i tera di nos puebo. Nos ke pa Shell limpia su shushedat, asina ku nos por piska i planta atrobe”. Na palabra ta Eric Dooh, un kunukero Nigeriano ku ta hibando un proseso den korte Ulandes kontra Shell ku a kontagiá su estankenan di piská i su kunukunan. Lionel Lepine ta representá e Indjannan di Athabasca Chipewyan First Nation di Canada. “Sakamentu di zeta for di e santu-petroli  ta destruí nos tera i awa, nos matanan medisinal i e animalnan indispensabel pa nos sobrevivensia, segun Lepine. Shell ta violá nos derechinan di pueblo indígeno i derechinan di generashonan den futuro. Awe nos ta den e reunion anual di akshonista pa para e kos aki”.

 

Awe Shell a saka su relato ofisial di 2010, i den e reunion di akshonistanan di Shell a parti e rapòrt ariba menshoná di Milieudefensie (Friends of The Earth di Ulanda) .  Nan a presentá  e rapòrt akí den forma di un asina yamá “erratum”, kaminda Milieudefensie ta hasi komo si fuera ta Shell ta na palabra i ta atmití  ku su kompania ta responsabel pa e daño innesesario kometé na medio ambiente i komunidatnan. Apesar di esei “Shell” ta bisa den e “erratum” akí ku el a siña di su fayonan i ta primintí ku den futuro esaki lo no pasa mas.

Idea di e “erratum” ta pa lanta akshonistanan i direktiva di Shell for di soño i mustranan riba e fayonan grave di Shell. Un estudio profundo ta forma base di e “erratum”. No por ta asina ku akshonistanan i direktiva di Shell ta kobra ganashinan na grandi a kosto di miseria ambiental i sosial rònt mundu.

Shell ta konsiente di e dañonan kometé kontra medio ambiente i komunidatnan, i e sa tambe ku mundialmente e ta violá derechi humano. A yega e ora pa tuma medida i kambia rumbo i pa soru pa den futuro e abusunan aki no tuma lugá mas.

Milieudefensie i e ret internashonal  Friends of the Earth International di kual Amigu di Tera tambe ta forma parti, ta eksihí pa Shell limpia e shushedat ku ela kousa i kompensá e viktimanan. Aparte di esei e mester prevení daño den futuro. Mester respetá Derechinan Humano  i kaminda ku operashon di Shell ta trese riesgo pa riwnan i reservanan di awa, pa salubridat, pa agrikultura i biodiversidat, Shell tin ku hasta para su operashon, i bai foi djei. Na tur kaminda di mundu Shell mester kambia su manera di operá i kibra definitivamente ku su manera di kustumber, esta kustumber di violá derechi humano i hasi daño na  medio ambiente sistemátikamente.

Por lesa e ‘erratum’ riba e sait: www.milieudefensie.nl/shelldamage

 

 

Yvette Raveneau

Presidente Amigu di Tera

Tel. 737 3965