Skibí pa: Amable Shon Ma Scoop

 

Tur maneho bon di algu ta bon biní. Tur maneho bon di loke sea, den kual tur esnan konserní haña partisipashon, outomatikamente tambe ta bon biní. Tur maneho nobo i bon ku wòrdu presentá/desaroyá ku partisipashon horizontal di tur esnan envolví ta bonbiní i eksistoso.

 

Kontrali ta ku kualkier maneho nobo ku bini for di un sírkulo chikitu i di ariba di un forma vertikal i diktatorial sin partispashon di ni pueblo ni di un parti di pueblo. Un komportamentu di e forma aki lo no haña ni akohida ni apoyo nunka di pueblo ni di esnan ku ta hasi uso frekuentemente i diario di nos playanan i bahianan. Nos pueblo a wanta hopi abusu di polítikonan lokal i tur e hotèlnan ku a sera nos playanan ku toleransha di gobièrnunan di turno a krea un sorto di “Apartheid”.

 

Nos a traha ántes komo sindikalista i formador/edukador di e klase trahadó di Caribe durante mas ku 19 aña. Nos a traha i forma trahadó na Kòrsou, Aruba, Bonaire, St.Maarten, Martinique, Gudeloupe, Cayenne, St.Kitts i Nevis, St. Lucia, St. Vincent, Grenada, Trinidad i  Tobago, Brabados, Jamaica, Antigua i Barbuda, Dominica, Haiti, Sto.Domingo, Puerto Rico, Venezuela i Cuba. Nos a bishitá kasi 90% di e playanan di e islanan di Caribe ariba menshoná. Nos tabata na St.Eustatius, Saba, St.Bart, Sürnam, Guyana.

 

Nos konosé Caribe i mayoria di su playanan manera nos plant’i man. Kasi òf tur e islanan aki nan playanan, ku òf sin hotel konstruí riba nan, i semper habrí kompletamente pa nan pueblonan, nan piskadónan i nan turistanan. Laman, bahia, i playanan rònt mundu ta propiedat di nan pueblonan, i no di ningun sorto di BMA sin partisipashon di esnan konserní (piskadó i pueblo). Sin partisipashon a paridat den e diektiva o gerensha di un eventual BMA ta eksigí un partisipashon real sine qua non. Diesun hòmber i muhé den Konseho Insular a disidí riba algu ku ta di pueblo sin konsulta previo di pueblo i sin duna pueblo ningun partisipashon.

 

(….)

 

Sigun nos ningun BMA por eksistí sin partisipashon real di nos pueblo ku ta entre otro tambe nos piskadónan. Nos pueblo no por aseptá bou di ningun kondishon un BMA ke e sabinan kier pusha den nos garganta. Loke nos pueblo i nos piskadónan mester hasi ta hala mara den un unidat isolidaridat pa defendé nan kousa, nos mester rechasá ku tur nos forsa e proyekto aki manera ela keda presentá. Nos ku ta skirbi e kolumna aki, tambe ta rechasá e proyekto aki pa motibu di falta di partisipashon real di nos pueblo i nos piskadónan.

 

p.s. ku solamente Unidat, Solidaridat, Akshonnan positivo nos lo por evitá BMA i oportunistanan di mishi ku nos derechonan, nos playanan i bahianan.

 

(saká for di “Extra” , diasabra 15 di yuli 2006).