Algun pasashi, saká for di Predikashi di Reverendo Pader Römer

21 di yuli 2006 den misa di Santa Ana

na okashon di lucha di piskadonan kontra BMA (Beach Management Authority)

 

Awendia hende ta kere masha den su mes, en berdat hende ta importante.  Despues, ku Dios a krea hende, e kreashon di mas importante ku tin den mundu, El a poné na kabes di henter universo anto Ela bisé: “Dominá tur loke ta kreashon i poné sirbibo”. E no a bisa ún hende so; Ela bisa humanidat. I humanidat ta pará na kabes di universo, pesei hende ta lo mas importante ku ta eksistí den mundu.

Awendia nos ta mira ku tin mil i un otro kos ku parse mas importante ku ser humano, e dignidat di e hende, e  honor di e hende , e balornan mas ayá ku tin den e hende. Awendia ta parse ku ta kos i no Dios ta dominá eksistensia di e bida humano, anto kos ta para bira hopi bia e desgrasia mes di humanidat.

Un par di hende riba nan mes ta kere ku ta plaka te kos, ku turismo ta e kos i awor nan ke bai bende, of entregá dominio di e playanan, i mas i mas nan ta sera nos. Di mes bo ta riba un isla, bo ta den un prison chikí, bo ta rondoná di awa. Pero ora sera i bo no por ni yega na e awa ei, bo ta den un prison chikitu, i e úniko kos ku falta ta pa pone poko trali pa bisa e hendenan: aki bosnan no tin mag di pasa. Anto esaki ta kompletamente un preso, un bestialidat, un disparati. I di unda e ta bini? Di e idea di grandesa, e idea di grandesa estúpido ku ta kere den plaka i no ta kere den dignidat humano. No ta kere den loke hendenan mes por, no ta bai konsultánan, no ta bai puntranan. No, ami ta disidí. Dios ta bisa: nò, e bida ku bo tin no ta di bo e ta. Nos ta tende kon ora  Hizkia (Isaias 38) ta muriendo, e ta sintié malu anto e ta bisa: “Señor, pero semper mi a sirbibo”. Anto Dios ta bisé: pero ta muri bo ta bai muri awor. Anto Hizkia ta bisa “Pero Señor, tene kompashon di mi”. Anto Dios ta bisé, “si bo ke bai kumpli na drechi, mi ke dunabo 15 aña mas”. Anto Dios ta kué un kos chikitu, un kuki di figo, e ta poné riba e herida i e herida ta kura i e por bai sirbi Dios di berdat. Esaki ta e momentu ku nos mester pidi Dios manda poko di e kuki di figonan ei pa nos pone riba alma di tur nos gobernantenan, di tur nos dirigentenan, pa nan tene na kuenta ku nan mester pone figo riba nan herida anto kambia nan mentalidat, kambia nan manera di pensa, haña un sentido humano. Den nan manera di aktua, haña un sentido humano bèk 

Goberná ke men sirbi e pueblo, no ke men pa e pueblo sirbibo. Hopi biaha gobernantenan ke kere ku nan ta hasi hustisia……   Pero tin un dicho Romano ku ta bisa : ”e hustisia mas grandi por ta e pió inhustisia ku bo por kometé, si e ta falta e sentido humano, ku ta loke mester guia un hende  den su bida”. Un sentido ku ta pone ku bo ta sinti, ku bo ta bira sensible pa nesesidat di e pueblo, pa anhelo di e pueblo, maske e mes no por ekspresá esei. Abo ku ta yamá pa bo goberná pa bo dirihí, abo mester tin e sentimentu ei. Anto si bo no tin e, pidi Señor pe, anto e lo dunabo e.

 

Nos ta bai den direkshon di bisa ku ..”tin hopi pobresa”. Esaki ta un manera masha fasil pa bo libra bo mes i  bisa “ban bringa pobresa”. Loke bo mester hasi no ta bringa pobresa, manera ta un gran kos bo ta hasi. Loke bo mester hasi ta bringa inhustisia sosial. Hopi hende no ke tende e palabra ei. Pasobra si tin inhustisia sosial, ta esnan ku ta dirigí, esnan ku ta na mando, ta nan ta permití esei. P’esei nan no ke tende esei.  Nan ke bringa pobresa, nan ke duna, regalá limosna aki i aya. Drecha kosnan chikí  pa tene hendenan

kontentu..

 

No gañe pueblo yen kos i promesa, i ora habri e rapòrtnan ku nan ta traha, bo ta weta ku e promé interes ta turistanan, hendenan di afó,  pa nos haña poko sen, pasó nan por trese plaka.  Playanan por produsí mas tantu plaka, p’esei turista, turista, turista, turista. Anto e pueblo…si anto e pueblo tambe tin mag di drenta.

Ma ta di nos e ta. Ta pa nos Dios a pone e playanan, ta nos Ela pone biba akí, no turista. Anto turista tin mag di bin mira loke ku nos ta gosa di dje. Nan mester bin mira kon felís nos ta ku e tiki ku nos tin

 

Duna e pueblo su dignidat bèk, duné e orguyo di su mes,  pa e por kana libremente, na kanti awa, mira solo baha, mira kon e laman ta hunga, kana drenta muha su pianan den dje, kontra ola. Esaki nos mester hasi i no poniendo playanan yen di stul pa otro hendenan bin sinta, gosa un ratu sali bai sin ku nan tin kunes ku nos. No, e pueblo mester lanta, e pueblo mester sinti su mes, e pueblo mester gosa di su mes. E pueblo mester bira orguyoso di loke e mes tin i loke e mes ta. I no laga hamas niun hende kita for di bo  loke Dios a dunabo pasó ta aki ela ponebo, ta aki ela lagabo nase, ta aki ela lagabo biba, ta aki ela dunabo teritorio, un laman presioso. No ku santu manera tin otro kaminda pero nos tin otro kos si; e zonido di laman ora ku e ta hunga den e piedanan. E beyesa ku bo ta mira rònt di bo, i hasta esaki nos tin ku diskubrí. Pasobra hasta esei nan a kita for di nos.

Nan ke bisti nos un brel ku ta tapa e bunitesa, e lus, e klaridat ku Dios a pone rondó di nos.  Bisti nos un brel di plaka, bisti un brel estranhero, bisti un brel di kos, anto ku e brel ei bo ta bai wak mundu. Anto e ora ei bo ta weta ku e mundu ei ta skur, mientras mundu ta tur kla ku por tin. E tin tur sorto di grandesa den dje ku abo no por weta ni deskubrí ku e brel skur, pasobra bo ta chambuká den lodo di dos plaka. Esaki mi amigunan ta e tristesa ku nos ta bibando awendia. Nos mester yama, no, no simplemente yama, eksihí sierto kosnan. Nos mester eksihí sensibilidat humano.

 

Poko aña pasá nan kier a lanta un hotel riba Awasá, awor ke kita e playanan i ponenan bou di sierto grupo di hende pa nan bai disidí kiko pueblo mag o no mag. Anto nos ta bira dia pa dia mas prezu den nos mes lugá, mas sin posibilidat i nan ta kibra bo orguyo, nan ta kibra bo sentimentu komo hende. Mas ku nada nan ke kaba ku nos identidat di Yu di Kòrsou. Masha poko nos ta papia di Yu di un lugá. Na Kòrsou sí nos ta bisa ku nos ta Yu di Kòrsou; solamente ku tristesa nos mester rekonosé ku e Kòrsou aki ta produsí mas hende ku ta abuzá di su yunan ku otro kaminda.  Nos tin hopi hende ku ta subi i ora nan yega nan ta lubidá ku e Kòrsou aki tin mas yu, i no nan so. Ku ta nos tur tin ku traha komo ruman ku otro, ku interes pa otro, nos mester pone esei dilanti. E ora ei nos ta diskubrí kiko ta e nesesidatnan berdadero di e pueblo. E nesesidat di dignidat, di sinti bo mes grandi. Pasobra den bista di Dios bo ta grandi. Ora nos mira hende di e weis ei, nos ta deskubrí e balor humano, nos ta deskubrí i kumisá sinti tambe e sensibilidat humano ku ta pone ku nos ta kaba ku tur loke ta restrikshon pa grandesa di pueblo. Un lei ku hustu ku e por parse, si e no ta sensible na humanidat, ku no ta respondé na sensibilidat humano, ta un lei inhustu. E ta komete inhustisia i e miseria di mas grandi. Ku e konfiansa ei nos mester resa pidi Dios. Si nos resa na drechi pidi Dios, E lo manda abundansia pa gia tantu gobernantenan i tur dirigentenan di pueblo…..

 

Transkripshon i selekshon: Yvette Raveneau.