Amigu di Tera       komunikado di prensa 12 di desèmber 2007

 

Islanan chikí den problema klimátiko grave

 

Siglo pasá lamán a subi ku 17 sèntimeter. Ekspertonan a kalkulá ku e siglo aki lamán por subi entre 18 pa 59 sèntimeter mas. Manera ta konosí, uzo di kombustibel manera gasolin i gasoil ta produsí gas ku ta keinta airu di nos planeta. Dia pa dia nos a bin ta hasi uzo eksageradamente di kombustibel i nos planeta ta keintando rápidamente. Konsekuensha ta ku lamán tambe ta keinta, i awa kayente ta tuma mas espasio, pesei lamán ta subi. Eis ku ta dirti na polonan Nort i Suit i riba serunan ku snew, tambe ta kontribuí na subimentu di lamán.

 

Mas haltu lamán ta, mas tera e por subi i inundá. Esaki a kumisá sosodé na algun isla manera Maldives (Oséano Indio) i Tuvalu den Oséano Pasífiko. Aki poko tempu nan por disparsé kompletamente bou di olanan di lamán.

 

Partinan di kosta di nos isla ku no ta haltu, manera Punda, Otrobanda i e area di refineria tambe ta kore peliger di inundashon dor di laman. Areanan turístiko kostal tambe por spera problema grave di lamán mas haltu. Un otro konsekuensha di keintamentu di nos planeta ta ku orkannan den Karibe ta bira mas fuerte. Den e parti sur di Karibe pa hopi aña a konsiderá un isla manera Grenada komo fuera di zona di orkán. Pero den un temporada di 10 luna (2004 – 2005) dos orkán a dal Grenada fuertemente. Na Kòrsou nos mester prepará pa eventualidatnan asina.

 

Preparashonnan efektivo ta kosta sèn. Pesei  islanan chikitu agrupá na Bali (Indonesia), kaminda mas ku 10.000 delegado di rònt mundu ta negoshando riba problemanan di kambio di klima, a deklará ku paisnan riku industrialisá mester bini ku kompensashonnan pa e desasternan klimátiko ku ta tumando lugá aktualmente i lo keda tuma lugá pa hopi aña mas. E mega-produktornan di gas ku ta kousa kalentamentu di planeta ta paisnan riku industrialisá.

 

Na Bali islanan chikí di entre otro Karibe, a deklará ku nan no ta konsiderá e plannan di paisnan riku pa baha nan konsumo di kombustibel komo adekuá pa prevení e peligernan grandi di kambio klimátiko. Un bahada drástiko di uzo di kombustibel ta nesesario pa salba hopi pais di desaster di klima kousá pa kalentamentu di nos planeta

 

Lástimamente ni Antiya Ulandés, ni Kòrsou no ta enbolbí den e negosashonnan internashonal riba kambio di klima. Nos gobièrnunan no ta tuma e asuntu aki na serio. Dia nos keda konfrontá físikamente ku e problema aki, nos ta kanta malay buskando asistensha tur kaminda.

Pero niun pais lo no asistí un otro pais ku no ke ta enbolbí den e prosesonan internashonal pa frena e problema lokal i internashonal di kambio di klima.

 Amigu di Tera ta spera ku pronto nos lo bira partísipe di e famia internashonal ku ta kombatí keintamentu di nos planeta.

 

Yvette Raveneau, Presidente di Amigu di Tera.  Tel. 7373965.