Amigu di Tera - komunikado di prensa 9 di ougùstùs 2011

 

Transporte nuklear den  Laman Karibe

 

Na yüli 2011 Caricom a denunsiá transportenan nuklear ku ta programá pa pasa den area di Karibe.  Ta trata di desperdisio nuklear, prosedente di reaktornan nuklear Oropeo ku despues di tratamentu den fábrikanan na Fransia i Inglatera ta bai Hapón via Oséano Atlántico, Lamán Karibe, Kanal di Panamá i Oséano Pasífiko.  Hapón ta warda e material sperando ku den futuro por desaroyá e teknologia pa generá energia for di dje. 

Despues di e katástrofe nuklear resien i e deklarashon di promé minister di Hapón ku mihó su pais skohe pa energia no-nuklear den futuro, ta difisil komprondé ku ta sigui importá material pa energia nuklear.

For di añanan 90 ku a kumisá ku e transportenan akí,  gobièrnunan i sientífikonan ke pone nos kere ku nan no ta forma ningun klase di peliger. Sinembargo, e desaster nuklear a mustra, ku ni e sientífikonan ni e polítikonan di Hapon no sa kon anda ku probleman nuklear. Hasta a bin sali na kla ku sientífikonan tin hopi duda den seguridat nuklear pero semper a skonde esaki pa publisidat. Mester konkluí  ku e transportenan nuklear via di nos lamanKaribe sientífikamente ta bini ku su riesgo.  Apesar di esei, nunka no a midi pa sa kiko ta e efektonan di e transportenan  akí riba hende i naturalesa den area di Karibe, sabiendo ku tin posibel emishon di radiashon.

For di komienso di e tranportenan nuklear den añanan 90, paisnan rònt Karibe a protestá. Un aksidente, pa chikí ku e por ta, por tin konsekuenshanan enorme pa habitantenan i e naturalesa vulnerabel di e region. Na Antiyas, e tempu ei, 9000 persona  a firma un petishon kontra e transportenan i tambe kontra depósito, produkshon òf dumping di desperdisio nuklear òf peligroso, arma nuklear i barkunan  nuklear. Tambe studiantenan a hiba un kampaña di konsientisashon bou di nos pueblo. Gobièrnu di Antia a tuma un posishon kontra di e tranportenan i a notifiká gobièrnu Ulandes ku na su turno a komuniká esaki na gobiernu Haponés. Caricom i mayoria país di Karibe a bai nos dilanti ku nan protéstanan serka gobièrnu di Hapón.

Simán pasá Amigu di Tera i Defensa Ambiental  a supliká Gobièrnu di Kòrsou pa tuma posishon kontra e transportenan nuklear i  komuniká  na Gobiernu di Reino ku nos ta spera di dje ku e tambe lo ekspresá di ta kontra di e transportenan nuklear den Karibe.  Un posishon asina ta demostrá desensia pa ku nos isla pero tambe pa ku Aruba i St. Maarten i en espesial pa ku Saba, St Eustatius i Boneiru ku awor tin laso mas fuerte ku Ulanda, i ku for di 10 di oktober di 2010 hasta ta forma parti di bio-diversidat di Ulanda.

Amigu di Tera i Defensa Ambiental ta kòrda gobièrnu ku, manera poko luna pasá nan a komuniká den un karta, ketu bai nan ta prekupá ku Korsou no ta midi radiashon.  For di 1994 ekspertonan a inventarisá fuentenan di radioaktividat riba nos isla, i a presentá un konsepto di lei na 1997. Sinembargu gobièrnunan di turno no a traté. Ounke muy probablemente e fuentenan di radioaktividat a oumentá durante e ultimo 17 añanan e riesgonan ku e siudadano ta kore no ta konosí.  Pa kolmo nos ta konfrontá radiashon adishonal di posibel transporte di desperdisio nuklear , di kual manera nos a bisa kaba no ta midi su efekto den nos region. Nos  prekupashon ta oumentá mas ainda.

Nos organisashonnan ta spera ku pronto ta bolbe inventarisá fuentenan di radiashon, ku ta adaptá e proposishon di lei i ku ta traté, i ku lo hiba un maneho efektivo riba e tereno akí . Nos ta spera tambe ku Gobièrnu ta tuma un posishon fuerte kontra e transportenan den awanan Karibense  programá.

 

Yvette Raveneau – Amigu di Tera

Lloyd Narain – Defensa Ambiental

Tel 7373965

 

Apendix: posibel fuentenan di radiashon na Kòrsou.

-fuentenan  pa uzo médiko, den indústria i otro uzo.

-fuentenan den aviashon, nabegashon, hafnan i aeropuerto.

-transporte via pòst

-transporte nuklear den region di Laman Karibe

-supmarinonan nuklear den Laman Karibe

- sentralnan di energia nuklear na kosta oriental di Mexico i Estados Unidos

-Dùmping di desperdisio nuklear den awanan di Laman Karibe

-Explorashon di gas i zeta den Laman Karibe

-Importashon di kuminda i artíkulo for di areanan infektá ku radioaktividat.