Amigu di Tera & Defensa Ambiental  - komunikado di prensa 23 di mei 2011

Kas popular na Kòrsou

Ta dikon FKP ta insistí pa traha kas na Wechi?

Den barionan urbano di Kòrsou tin bastante tereno ainda pa traha kas nobo. Fundashon Kas Popular ta enkargá ku e tarea di traha kas pagabel pa e hendenan ku tin un entrada abou. Tarea di gobièrnu ta pa duna  FKP tereno pa konstrukshon asina ku e Kompania di Gobièrnu akí por sòru pa esnan ku poko entrada por biba den un bon kas. Tambe gobièrnu ta supsidiá bibienda  pa asina baha preshon di hür pa esnan ku ta den nesesidat.  

Pa fortalesé e struktura urbano, i pa hasi mihó uzo di espasio i di finansas , mester traha bibienda den e parti urbano di Willemstad (i otro nukleonan di bibienda urbano, manera ta stipulá den lei). Komo ku preis di kombustibel  ta sigi subi i transporte ta bira mas karu, un maneho pa tene rutanan  kòrtiku ta yuda baha uzo di kombustibel. Un maneho asina ta duna alabes mas oportunidat pa yega na mihó transporte públiko.  Tambe tin un gran potensial pa traha kas nobo i pa drecha kas den barionan eksistente.

 Na 2006 FKP i DROV a traha un nota di maneho for di kual nos a saka e pasashinan ariba menshoná. Un nota kaminda ta bisa ku den barionan eksisitente tin sufisiente posibilidat pa traha kas nobo. Ta trata di un nota di maneho pa e periodo 2007 te 2011 ku Bestuurscollege a aprobá. Niun kaminda den e nota akí no tin menshón di traha kas na Wechi, al kontrario. Meta prinsipal ta pa traha kas den barionan eksistente. Mientrastantu ni gobièrnu ni FKP no ta hasiendo nan trabou, i esaki ta birando dia pa dia mas bisto.

Ta dikon FKP ta skohe pa pone nan tarea un banda i fiha prinsipalmente riba Wechi? E kompania di gobiernu aki a legumai nan tarea, esta, traha kas di pueblo, for di masha dia i a subi merkado di kas pa hendenan ku tin mas entrada. Na Wechi gran mayoria di e kasnan planeá ta pa hendenan ku entradanan mas haltu.

Ta straño ku ounke FKP a subi merkado di  konstrukshon di kas nos no ta tende protesta di desaroyadónan ni di esnan den negoshi di tereno i konstrukshon. Ta parse manera e sistema akí tin bentaha pa nan. Ta remarkabel kon entusiasmá politikonan ta pa traha kas den un area ku gran importansia pa kolekshon di awa i pa desague, i no ke traha kas na un manera sistemátiko den areanan urbano eksistente, manera ta deliñá den maneho di gobièrnu. Nos no ta tende nada tokante e 104 barionan den mal estado ku ta pidi ouksilio. Al mismo tiempo nos patriotanan ta habri kaminda pa instanshanan di ayudo Ulandes pa nan drecha algun kos aki i aya den barionan.

Palabranan di polítikonan, komo si fuera nan ta prekupá ku esnan ku un entrada abou, i ku ta p’esei nan mester di Wechi pa konstrui algun kas pa pueblo ta para bira palabranan populista, mientras ku e nogoshantenan di Real Estate ta hari kontentu.

Nunka nos representantenan den Eilandsraad /Staten no a kambia e tarea di FKP, esta traha kas di pueblo. Tòg di manera misterioso FKP a para bira un kontratista, un banko di hypothek, un negoshante di kas, anto un ku ta haña privilegio di parti di polítika.

Den kaso den korte di Amigu di Tera kontra gobièrnu, FKP ta tilda Amigu di Tera di ta eksaherá e potensial ku tin pa traha kas den area urbano. Pero esaki Amigu di Tera a saka for di e propio nota di maneho di gobiernu huntu ku FKP. Asinaki ta purba brua korte i alabes pueblo di Kòrsou, ta krea espektativa falsu serka pueblo ku tin mester di kas, i alabes ta sirbi e negoshi di benta di tereno i trahamentu di kas. Esnan ku awe na 2011 ta bibando den bario, ta pa nan kuenta.

Yvette Raveneau

Amigu di Tera

 

Lloyd Narain

Defensa Ambiental

Tel. 737 3965