Amigu di Tera & Defensa Ambiental    Komunikado di prensa 2 di ougùstùs 2010

 

Wechi a kosto di 104 bario

 

Algun aña  pasá  CBS a siñalá  un situashon di dekaida serio den 104 di e 270 barionanan di Kòrsou. E situashon sosial, kalidat di bibienda i fasilidatnan básiko den e barionan akí  pa hopi dékada ta grita pa intervenshon profundo, den kual ta atendé tur e problemanan akí pareu, esta un maneho integral ku partisipashon intensivo di habitantenan di bario. Tur e añanan ei gruponan di bario a akudí na gobièrnu, pero en bano. Ku algun kambio minimal, den algun bario, gobièrnu de bes en kuando ta purba tene e habitantenan trankil.

 

Den barionan di Willemstad nos ta mira kon poulatinamente mas i mas kas ta dekaí, sistemanan di riol no ta funkshoná, tubonan di awa kibrá, kayanan yen di buraku. Tur esaki pa motibo di falta di mantenshon. E situashonnan akí ta kontribuí na oumentu di problemanan soshal. Den su maneho di bibienda, gobièrnu mes a stipulá ku mester drecha barionan eksistente i kasnan ku ta den mal estado. A pesar di esei, e ta konstatá den diferente dokumento di maneho, ku den barionan eksistente tin bastante lugá pa konstrukshon di bibienda nobo. Tambe tin miles di kas di bon kalidat, i diferente tereno den plannan di parselashon eksistente, ku ta pará bashí. Dokumentonan di gobièrnu ta enfatisá ku mester traha duru pa barionan no sigui dekaí i ku mester halsa kalidat di bida di e habitantenan. Pero BC no ta saka man hasi nada ku e maneho ku e mes a stipulá. Ta sigui lubidá e 104 barionan den mal estado.

 

Un dicho afrikano ta bisa ku mester solushoná problemanan kaminda ku nan ta. Nos polítika ta pensa otro. E ta evitá di atendé problemanan difísil di barionan i en realidat ta hasi nan pió. Alabes  e ta huí bai dilanti i ta permití FKP pa pasa ku katapila destruí e area di plantashi bieuw i di naturalesa na Wechi pa un miyon di florin, ku e meta pa konstruí un bario nobo.

Wechi, un lugá kaminda awa di un area grandi ta pasa ku roi drenta i keda.i sak den suela, a bira víktima di un di e krímennan ambiental di mas grandi di último añanan i ta un ehèmpel palpante di mal gobernashon. Ta destruí naturalesa pa skonde fayo di un maneho di bibienda, i BC i FKP ta preferá di hasi esaki en bes di hiba un maneho integral di bario, ku ta duna habitantenan derechi di partisipashon den diseño di nan mes bario.

Ta sumamente straño ku BC no ta ehekutá su mes maneho di bibienda, pero alabes e plannan di Wechi no tin nada di haber ku maneho di bibienda popular, komo ku ta bai konstruí pa e gruponan di mas rekurso. Pa haña permit pa esaki, Konseho Insular mester a tene un debate fundamental tokantenan tareanan di FKP i e kategorianan pa kual e fundashon akí mester traha. Esaki nunka no a tuma lugá.

Ta áktua di un manera deskabeyá ku bibienda popular i e gruponan mas swak di nos pais ta e víktima. Ta pasobra no tin plaka nos ta neglishá barionan di pueblo, polítikonan ta bisa. Pero awor ta parse ku pa Wechi si tin plaka, ku otro palabra, e otro barionan por bien lubidá ningun kambio i adelanto pa algun dékada den futuro.

 

Mas grandi e kantidat di hende riba lista di espera di FKP, mas bisto ta bira na pueblo kon enorme e negligensha gubernamental di barionan ta. Polítika mester sinti su mes yamá pa atendé barionan ku dòbel fervor, en bes di seka e area pa fangu awa ku yama Wechi permanentemente i yené ku konstrukshon. I mas bunita e promesanan di FKP ku Wechi, mas e habitantenan di otro barionan ta bin komprondé ku pa nan no tin nada.

E plan di Wechi ta kompletamente kontrali na e maneho ku gobiernu a stipulá. Pesei ta di komprondé ku pa bende e plan di Wechi  komo un plan heroiko, FKP ta eksaherá e kantidat di hende riba su lista di espera di bibienda.

Pa yega na un maneho gubernamental basá riba echo, mester bini un investigashon imparsial en bes di konfia sifranan di FKP. Lo ta bon pa alabes investigá e motibonan real di kon BC a desviá di nan maneho di bibienda i a bira desaroyadó di proyekto.

 

 

Amigu di Tera

Yvette Raveneau

 

 

Defensa Ambiental

Lloyd Narain