Amigu di Tera - Komunikado di prensa 24 di mei 2011

Destrukshon di naturalesa na Vaersenbaai

 

Awor ta un paraiso den saliñanan na Vaersenbaai ta bira víktima di desaroyadonan di proyekto. Asosiashon di Sport di kuerpo polisial a hür of bende Vaersenbaai ku un desaroyadó ku ta yenando e saliña ku greis sin miserikòrdia. E saliña ta propiedat di gobièrnu, i pa lei ta area di konservashon ku meresé protekshon di parti di gobièrnu. Ta di lamentá ku direktiva di e Club di polis akí no ta mustra niun amor pa nos naturalesa. Ta di spera ku despues di e insidente lamentabel akí , polis ta bai demostrá mas protekshon di naturalesa. Ta bale la pena studia e relashon entre  komersialisashon di Vaersenbaai, destrukshon di naturalesa i eksklushon di pueblo lokal for di playanan, pa yega na plannan nobo pa anda di un manera responsabel ku hende i naturalesa den e area di Vaersenbaai.

Muchu biaha desaroyadonan ta dal bai, destruyendo areanan di naturalesa sperando ku gobièrnu no ta para nan. Den akuerdo di gobernashon tin pará ku mester kita red tape i bai pa red carpet. Te ainda nos ke sali for di e punto di bista ku no ta e idea di gobièrnu pa pone e red carpet, e tapeit korá, na Vaersenbaai i otro areanan di naturalesa na Kòrsou.

Ademas por lesa den akuerdo di gobernashon ku lo protehá naturalesa, ku lo tin kòntròl i ku ta konsientisá pueblo di nan deber komo siudadano pa tuma responsabilidat di kuida naturalesa i medio ambiente. Gobiernu ta bai stimulá siudadanonan pa trata nos flora i founa ku rèspèt pa generashonnan binidero tambe por gosa di dje, teniendo kuenta ku nos isla ta chikí. Esaki ta reflehá sabiduria pasobra en bèrdat naturalesa di un isla chikí i densamente poblá ta masha vulnerabel i mester di atenshon i kuido spesial.

Awor nos ta warda riba e echonan. Nos ta ansioso pa sa si gobièrnu ta obligá e desaroyadó pa saka e greis bèk, asina ku e saliña por kumisá sana. Ta bini un kaso den korte di gobièrnu kontra e desaroyadó pa violashon di lei, destruyendo area di konservashon, pa kolmo riba tereno di gobièrnu ku meta pa hasi uzo di dje sin permit? Nos a pone outoridatnan na altura di loke ta pasando na Vaersenbaai, i Amigu di Tera ta manda un karta suplikando gobièrnu pa tuma medidanan fuerte den e kestion akí.

 

Potrèt: Vaersenbaai, paraiso i estupides di dèmpel saliña.

Yvette Raveneau, presidente Amigu di Tera, tel 7373965.