Amigu di Tera

Komunikado di prensa   22 di aprel 2009. Dia di Mama Tera

 

Yama adikshon na petroli ayó     

 

Diariamente outo i otro medionan di transporte ta uza un enorme kantidat di kombustibel. Mundialmente petroli ta birando skars i konsekuentemente su preis ta subi. De bes en kuando preis ta baha pero e tendensia di subimentu di preis ta ireversibel. Uzo di petroli komo fuente di energia na ta duradero i hasta nos mester teme ku den futuro serkano nos no por haña petroli kumpra, pasobra den komersio di petroli nos lo mester kompetí ku gruponan hopi mas pudente ku nos. Nos mester kuminsá fiha riba uzo di otro fuentenan di energia i alabes yega na uza menos energia posibel.

 

Un manera pa ekonomisá energia ta pa solamente permití konstrukshon di kas i bario den area di Groot Willemstad. Trahamentu di kas i proyektonan plamá rònt  Kòrsou ta trese kuné ku diariamente mas i mas hende tin ku kore distansianan grandi i uza mas i mas kombustibel.

 

Un manera pa baha konsumo di energia den transporte ta pa stimulá benta i kompra di outo ku ta gasta masha poko kombustibel. Konstrukshon di kaminda pa kore baiskel  i asera pa kana, ta otro manera pa stimulá un trafiko mas sigur, i liber di uzo di petroli. 

 

Transporte Públiko mester kambia kompletamente. Ta klaro ku nos mester uza bùs ku ta uza lo minimo na energia, pero alabes transporte públiko mester bira atraktivo asina ku mas i mas hende ta bai hasi uzo di dje, i ta hasi menos uzo di outo.

 

Transporte públiko mester ta efisiente, ku un ret ekilibrá di tur e diferente kompanianan di bùs pa transportá pasaheronan den menos tempu posibel i na un preis abou. Si mas hende hasi uzo di transporte públiko esaki ta resultá den menos tráfiko di outo riba nos kamindanan i menos uzo di kombustibel riba nos isla.

 

Konsekuentemente esaki ta resultá den un bahada di gastu na kombustibel pa henter komunidat, dunando mas espasio finansiero pa mehorá e sistema di transporte públiko i hasié ainda menos dependiente di petroli.

 

Den e sistema di transporte nobo aki, shofùrnan di bùs ta aportá aktivamente na un komunidat duradero ku menos uzo di energia, menos polushon i ku ta fiha riba un futuro realista. Meskos ta konta pa e pasaheronan ku ta hasi uzo di transporte públiko.

 

Yvette Raveneau, Presidente Amigu di Tera.

Tel 7373965