Amigu di Tera – Defensa Ambiental

 

Komunikado di prensa 14 di Mei 2009

 

Outonomia

 

Den e debatenan tokante Outonomia ta pinta un futuro di prosperidat pa nos isla, basta pueblo skohe e opshon ku kada kampo na su turno ta vosiferá.

 

Sinembargo, e problemanan ku a bin ta akumulá diferente desenia kaba, i ku dia pa dia ta hasi bida di habitantenan mas difisil, no ta haña atenshon. Esaki ta konta espesífikamente pa e medio ambiente fragil di nos isla, ku pa motibu di negligensia ta birando dia pa dia menos habitabel.

 

Den e último dos desenianan a hala atenshon, a studia i presentá problemanan ambiental fundamental na gobernantenan. Na 1989, 1990 i 1991 tabatin marcha di protesta masál den barionan di Wishi i Marchena kontra polushon di airu. E tempu ei kaba tabata mas ku kla ku mester a skohe entre inovashon struktural òf sera refineria. Awe, binti aña despues politika ketu bai no sa kiko e tin ku hasi i no ta tuma desishon.

 

Binti aña pasá den un rapòrt voluminoso a rekomendá kambionan drástiko den nos sistema di energia. Eilandsraad, e tempu ei, den un reunión tumultuoso a disidí pa duna e kompanianan di energia, ku apsolutamente no tabata inkliná na trese e kambionan aki, aun mas poder. Awe no tin fundeshi sano di e sektor aki, i nos ta mas leu ainda for di un sistema energétiko sostenibel.

 

Algun desenia kaba pueblo ta oponé ku ta sera kosta i hasié inasesibel.

E resultado di e último binti pa trinta aña di gobernashon ‘patriotiko’ ta ku awe 80% di kosta suit  no ta asesibel libremente i ku e tendensia aki ta sigi ketu bai. E lasonan ku nos, komo habitantenan di un isla chikí, tin ku laman ta bai perdí, i huntu kuné nos ta pèrdè interes i responsabilidat pa kuidé. Paisahe di nos isla tin un aspekto fragmentá i bruá pasobra gobièrnu ta permití konstrukshon tur kaminda, hasta konstrukshon ilegal, i no ta tuma medida kontra kobamentu di greis, destrukshon di naturalesa, dempelmentu, sakamentu di santu for di laman. Gobiernu mes ta destruí mondi na gran eskala pafó di areanan rural i ta kore pa su responsabilidat di drecha barionan eksistente na un manera struktural.

Di un manera sistemátiko ta nenga tur maneho, estudio, i lei, ku por yuda trese solushon pa e asuntunan menshoná.

 

Pa loke ta toka shushi: ta generalmente  konosí ku e mihó opshon ta pa evitá di kima of dera shushi. Por recycle, re-usa of traha kòmpòst, of mihó ainda bini ku medidanan di prevenshon. Koriendo riba Kòrsòu bo ta puntra bo mes si ta eksistí un maneho di shushi mes.

 

Ta tolerá i akseptá destrukshon di areanan di palu di mangel, kaminda hopi di nos organismonan di laman i diferente tipo di piska ta nase i krese, hasiendo nos laman pober na piská, i kabando ku nos refnan di koral ku ta dependé di e piskanan pa nan mantenshon.

 

 Shushamentu di tereno i awa dor di empresa, empresa ku ta establesé den areanan di bibienda, huma di outo, molèster di tráfiko, i hopo mas, a keda diskutí hopi biaha, a studia nan i hasta a traha maneho pa nan, pero nunka no a yega na ehekushon.

 

Polítika di Willemstad ta akseptá degradashon di nos medio ambiente  argumentando ku ekonomia ta prioridat. Ku otro palabra, degradashon di naturalesa i asalto riba nos salú ta parti inherente di su vishon di desaroyo. Ta kore ku pueblo i piskadonan for di kosta na nòmber di e mes un vishon aki. Esaki sin duda ta bin trese mas miseria. Nos meresé i nos ta anhelá un otro tipo di desaroyo.

 

Despues di referèndum, kual sea e resultado, pueblo, ku su organisashonnan independiente di politika, mester traha duru pa yega na realisá e otro vishon di desaroyo. Ta esei nos ke men ora nos ta papia di un berdadero outonomia.

 

 

Defensa Ambiental                        Amigu di Tera

Lloyd Narain                                  Yvette Raveneau

 

Tel. 737 3965